رايق وسايق دلاله

 رايق ..

ماله .. دا رايق وسايق دلاله

جمهور الكوره بيستخدم المصطلح ع لاعب بيلعب بشياكه وتحس ان الصعب بتاعه سهل او لما فريقه يكسب ماتش نتيجه تقيله ويمسك الملعب بالطول والارض..

دا انسب وصف لمسلسل (البحث عن علا) 

كل حاجه في المسلسل رايقه 

سيناريو تمثيل اخراج ديكور 

تحس ان شوية مواضيع اجتماعيه قرر صناع العمل يقعدوا ع الكنبه ويحكوا لنا اللي حصل 

اذ كنت جاي متحفظ لانك عاوز علا بتاعت عايزه اتجوز هو قادر يخليك تنساها وتقبلها بالتغييرات الجديده

اذ كنت جاي متحفظ وتقول ي عم دا نتفليكس هتغير حاجات حسب اجندتها هو يجاوب بالفعل لا 

اذ كنت جاي تنتقد م هى هى نفس المواضيغ فحابب اقولك التناول ي سيدي يعلي او ينزل عمل سابع ارض 

المسلسل رايق رايق رايق بمعنى الكلمه يا اخي دا حتى اختيار التراكات رايق

وتعالى احكيلك عن كنبة في بيتنا مليانة أحضان... غرقانة أحلام

أساطير عن حب حكاوي عن قلب إتشال واتحط وهو لسه بخير

ياما شافت منا ايام ياما شالت عنا الأوزان

وهاتفضل شاهدة وشيلانا جوه الدوامة

عادي يابني ماتقلقش روح يلا اتعك وماتخافش

الدنيا هاتضحك ميت ضحكة وعادي برده ماتضحكش

كنبتنا هاتفضل موجودة هنا جوة في بيتنا ومفرودة ف تعالى اشكيلنا

و اطلع بره وشوف وحب وتعالى احكيلنا عللي حصل

إكسر قلبك عادي وهوب وتعالى احكيلنا عللي حصل

نط براسك خش ودب وتعالى احكيلنا عللي حصل